Banesa e familjes Strati

BO28-Banesa e familjes Strati

Ndërtesa në foto i përket familjes Strati, paraardhësit e të cilës, ishin tregtarë të njohur të materialeve të ndërtimit dhe eksportit të qymyrit. Ata erdhën nga Voskopoja në Vlorë, në fillim të shekullit XIX. Këtu, në vitin 1895, u themelua Klubi Patriotik “Vlora”, një organizatë e njohur patriotike, ku bënin pjesë Dush Strati, Musa Çakërri, Elmaz Xhaferi, Jorgo Koleka, Kristo Karbunara, Hamit Lumi, Sotir Kolea etj. 

Punimet për ndërtimin e godinës, fillimisht e parashikuar si një godinë dy katëshe, kanë nisur në vitet 1870-të dhe kanë përfunduar mes viteve 1905-1908. Ajo është e stilit neoklasik, me ndikime të stilit ottoman dhe atij italian, veçanërisht në katin e tretë, që u ndërtua më vonë në dy faza dhe i ndarë nga dy katet e para me një kornizë dekorative. Në fasadën e godinës, spikasin kolonat prej guri, ballkonet me kangjella hekuri të përpunuar, ku janë vendosur edhe incialet e pronarit, Thanas Strati. Banesa është ndër më të spikaturat për kohën, është ndërtuar nga grupet e mjeshtrave lokalë, me gurin tipik të zonës së Drashovicës. Në dhomat e gjumit, në katin e dytë dhe të tretë, janë krijuar dy hapësira me një hapësirë të konsiderueshme, ku vendoseshin kryesisht “takëmet” e fjetjes, jorganët, jastëkët, dyshekë, çarçafët, mbulesa, etj. Këtë element, e hasim në pak banesa të tjera të zonës. 

Me familjen Strati, lidhen emrat e Miti (Dhimitër) Strati, dëshmor i Luftës Antifashiste Nacional –Çlirimtare, si dhe Kristaq Strati, kryetar i bashkisë së Vlorës (1939-1941), student i shkëlqyer në Universitetin e Torinos, jurist i shquar në Itali e ish futbollist i Juventusit. Përpos këtyre, Kristaq Strati njihet edhe si personi që ndërtoi ujësjellësin e qytetit, krijues skuadrës së futbollit “Flamurtari” dhe një nga themeluesit e Fedaratës Shqiptare të Futbollit. Ai jetonte në këtë banesë, bashkë me prindërit, me bashkëshorten dhe dy fëmijët. 

Në fillim të shekullit XIX, një degë e kësaj familjeje, u vendos në qytetin e Triestes, ku ndërtoi edhe një nga objektet më të famshme në këtë qytet, “Palazzo Stratti”, në Piazza Unità.