Godina Bombej

BO13 – Godina Bombej

Godina, që vendasit e njohin me emërtimin “Godina Bombej”, mendohet të jetë ndërtuar në fillim të 10 vjeçarit të dytë të shekullit XX-të, prej Xhemil Bej Vlorës. Ajo ka qenë një nga hotelet më të frekuentuara e luksoze të qytetit deri në vitin 1947, kur u shtetëzua sipas ligjeve të kohës. Fillimisht emërtohej Hotel “Ballkan” dhe pastaj, Hotel “New York”, Hotel “Gjirokastra” dhe së fundi “Grand Hotel Korça”. Kjo ndryshueshmëri e emërtimit, lidhet edhe me pronarët, apo ortakët që u përfshinë në administrimin e tij.

Arkitektura i përket në tërësi stilit neoklasik, e alternuar me elementë të traditës qytetare vlonjate dhe me ndikime të stilit italian, të reflektuar në çatinë prej druri, e mbuluar me tjegulla, që u sollën nga Italia. Për ndërtimin e saj punuan brigada ndërtimi me origjinë nga Korça dhe Panariti, respektivisht për muret me material guri të gdhendur dhe çatinë e konstruksionin e brendshëm prej druri, ndërkohë që, gollobordasit, u morën me llaçin, një lloj përzierje gëlqereje të stazhionuar.

Këtu kanë pasur selinë shumë organizata atdhetare (Djalëria e Vlorës, Bashkimi, Opinga, Mësuesit e Labërisë) dhe janë akomoduar personalitete të shquara të historisë së Shqipërisë si Fan Noli, Çerçiz e Bajo Topulli, Mihal Grameno, Avni Rustemi, etj.

Godina u dogj në 18 shkurt 2016, për t’u restauruar dy vjet më vonë nga Fondacioni Shqiptaro Amerikan për Zhvillim, në kuadër të projektit për rijetëzimin e qendrës historike Vlorë.