Godina e Klubit “Labëria”

BO10-Godina e Klubit “Labëria”

Godina e klubit “Labëria” është ndër më të vjetrat në qendrën historike e shpallur Monument Kulture Kategoria I dhe spikat për konstruktin, bukurinë e fasadës, për dimensionet në raport me sheshin dhe objektet e tjera. Para shpalljes së pavarësisë, ka shërbyer si godinë administrative dhe, më pas, si seli e klubit patriotik “Labëria”. Më vonë, godina ka kryer funksione të tjera si, hotel dhe shtëpi banimi.

Në vitin 1908, në qytetin e Vlorës u krijua Klubi Atdhetar “Labëria”, shoqata e parë patriotike në Shqipëri, nismë e një grupi patriotësh të njohur në këtë qytet e më gjerë. Kjo ngjarje, ndër më të rëndësishmet e fillim shekullit XX, i parapriu momentit më madhor në historinë e Shqipërisë, Shpalljes së Pavarësisë Kombëtare. Zgjedhja e Ismail Qemalit, si president nderi, vlerësohet nga historianët, si një simbolikë domethënëse, që lidhet me objektivat e aktivitetit të këtij klubi. 

Objekti, ku kreu aktivitetin e vet klubi, evokon karakteristika të rëndësishme të banesës qytetare të shekullit XIX, sepse sintetizon një tipologji të veçantë të kësaj banese me tre kate, papafingo dhe oborr të brendshëm, me sistem konstruktiv me mure mbajtëse me material guri dhe muraturë të brendshme prej çatmaje (qerpiçi). Është ndërtesë e projektuar, e tipologjisë rezidenciale individuale, në të cilën arkitektonikisht përzihen tradita, niveli kulturor ekonomik i porositësit etj. Në një vështrim të përgjithshëm, kjo godinë përputhet me të gjitha karakteristikat e banesës së mbyllur të tipit të ri, e cila u shfaq në dhjetëvjeçarët e fundit të shekullit XIX edhe në Vlorë, krahas Tiranës, Beratit, Elbasanit etj. Ajo mendohet të jetë ndërtuar fillimisht si një objekt dy katësh, në tre dekadat e para të shekullit të XIX dhe të jetë rindërtuar në fund të këtij shekulli, kur është shtuar edhe kati i tretë.