Godina ku u xhirua filmi “Nëntori i Dytë”

BO 37/2-Godina ku u xhirua filmi “Nëntori i Dytë”

Në këtë banesë, pronë e patriotit, firmëtarit të Aktit të Pavarësisë dhe tregtarit gjithashtu të njohur, Aristidh Ruçi, ka funksionuar posta prej ku, në mbasditen e vonë të datës 28 Nëntor 1912, ju përcoll Fuqive të Mëdha, lajmi i Shpalljes së Pavarësisë. Atdhetari Aristidh Ruçi, e bleu këtë banesë prej qytetarit nga Stambolli, Jorgj Mavropulli, me një vlerë monetare prej 10 mijë franga ari. 

Një fakt interesant është se në këtë banesë janë luajtur disa nga skenat më të spikatura të filmit “Nëntori i Dytë”,

Godina është shpallur Monument Kulture i Kategorisë së II dhe rezulton të jetë ndërtuar në gjysmën e dytë të shekullit XIX, por e rindërtuar më pas si një tip i ri banese ku mbizotërojnë, simetria në strukturë, ekuilibri mes pamjes së jashtme dhe hapësirës së brendshme, çatia e mbuluar me tjegulla “Marsejeze”, fasada tërheqëse e kuruar në të gjitha elementët e saj, me katër dritare të mëdha me grila druri dhe kasë dërrase prej pishe, të fashuara me dorë dhe të përpunuara nga brenda me arkitrarë dhe qemerë cilindrikë. Muret perimetrikë në dy kate janë prej guri të gurores së Kaninës, ndërsa ndarjet e brendshme në hershmëri kanë qenë prej çatmaje, dyshemetë prej druri, tavanet me rasë kallami dhe të suvatuara.