Ish librari “Shpresa”

BO29-Ish librari “Shpresa”

Ish librari “Shpresa” është një godinë e thjeshtë arktektonikisht, me konstruksion guri, e konceptuar me dy hapësira dhe e plotësuar me një papafingo të shfrytëzueshme, vlerat e të cilës lidhen kryesisht me aspektin historik.

Ajo është ndërtuar në fillim të viteve 1920-të, nga tregtari Irfan Shehu, si pjesë e një skeme arkitekturore në formë “L”-je, e realizuar në zbatim të studimit të parë urbanistik, apo Planit të Përgjithshëm Rregullues të Bashkisë Vlorë të vitit 1923, kur zyrën e urbanistikës e drejtonte arkitekti italian, Paolo Palleri. 

Në këtë godinë, ka qenë Librari “Shpresa” e Ibrahim Shytit, publicist, atdhetar, intelektual i shquar vlonjat, “Qytetar Nderi i Vlorës”, fondi i jashtëzakonshëm prej 5000 librash të të cilit, i është dhuruar Bashkisë.

Në mjediset e kësaj librarie, që ka shërbyer si qendër për edukimin atdhetar dhe qytetar, por edhe për ruajtjen dhe promovimin e traditave të Vlorës, ku ka ushtruar një pjesë të aktivitetit të vet gjatë Luftës së Dytë Botërore, shkrimtari, publicisti dhe luftëtari i Lirisë, Petro Marko, është përgatitur dhe daktilografuar trakti i parë antifashist në Shqipëri. 

Në vitet 1960, godina u shtetëzua dhe për rreth 30 vjet u shfrytëzua si mjedis për shërbimet komunale të qytetit.