Muzeu Historik

Objekti është ndërtuar në vitin 1918 nga mjeshtrit e kohës. Deri në vitin 1939 ishte Bashkia e qytetit të Vlorës. Në mjediset e kësaj godine në vitet 1944 - 1970 punuan organizata masive. Pas vitit 1970, ai u kthye në Muzeun Historik të Rrethit. Shquhet për vlerat historike dhe arkitekturore që mbart. Objekti ka dy kate në formë drejtkëndëshe që i përshtatet planimetrisë së zonës ku është ndërtuar. Dritaret janë të unifikuara dhe të stilizuara me elemente dekorative që i japin më shumë vlerë këtij objekti. Në fasadat e objektit bien në sy elemente dekorative drejtkëndëshe dhe lineare, si dhe një ballkon dekorativ në katin e dytë, i cili luan edhe rolin e strehës së hyrjes.
Në vitin 2017, një pjesë e çatisë së ndërtesës u restaurua.
Ndërtimi i objektit është bërë me mure mbajtëse dhe kolona në brendësi të tij. Objekti është pjesërisht i mbuluar me mbulim, me konstruksion druri dhe çati me tjegulla dhe pjesërisht me tarracë. Për ndërtimin e pllakave u përdorën trarët dhe qemerët e tullave.