Shtëpia e patriotes, Marigo Posio

BO12-Shtëpia e patriotes, Marigo Posio

Godina njëkatëshe në foto, ka një strukturë të thjeshtë, por vlera të mëdha historike sepse ajo lidhet me Marigo Posion, një figurë emblematike e periudhës së Pavarësisë por edhe e viteve në vijim, simbol i flamurit që u ngrit në 28 Nëntor të vitit 1912.

Godina është ndërtuar në 1891, çka vërtetohet nga viti i skalitur në fasadën e ndërtesës, që u shfaq gjatë punimeve restauruese,  kur u evidentua muratura origjinale me gurë. Objekti, është një banesë qyetare pothuajse e tipit të ri, ku ndërthuren ndikime të stileve të ndryshme, duke përfshirë atë otoman, si dhe tradita lokale, alternuar me shijet e ustallarëve që punuan për ndërtimin e saj, origjinën e formimit të tyre, si dhe shijet e pronarit që e porositi atë. Është një banesë e thjeshtë, solide, simetrike dhe me planimetri katërkëndore, mjaft e kuruar në fasadën e saj, si edhe në hapësirën e brendshme, e realizuar me teknikën e ndërtimit me gurë në korpusin e jashtëm dhe tulla në muret ndarëse. Një hark i thyer dekorativ dhe i shtrirë në të gjithë gjerësinë e fasadës, të kujton një valë deti të zgjatur, që vjen nga thellësia e përplaset në breg. 

Figura e Marigo Posios është e rëndësishme për një sërë arsyesh, si protagoniste në Shpalljen e Pavarësisë dhe si luftëtare e rradhëve të para për liritë dhe emancipimin e grave në dy dekadat që pasuan 1912-ën. Me shoqërinë që krijoi në vitin 1914, të cilën më pas e shndërroi në një gazetë me mjaft protagonizëm për kohën, ajo skaliti një staturë të respektuar dhe të vlerësuar nga të gjithë faktorët në Shqipëri.