Pazari i Tiranës dhe sheshi Avni Rustemi, është një treg i gjallë dhe modern i vendosur pak fare larg qendrës së kryeqytetit të Shqipërisë i cili që prej vitit 2017 është kthyer në një nga zonat më të preferuara të qytetit të Tiranës. Pazari i Ri karakterizohet nga arkitektura dhe dizajni modern, i cili përmban një përzierje të elementeve tradicionale dhe bashkëkohore. Vizitorët do të gjejnë produkte të freskëta të zonës dhe do të kenë mundësinë të provojnë gatime tradicionale dhe moderne, apo thjesht të kalojnë disa momente relaksi brenda një ambienti autentik. Aktualisht pazari ka në përbërje 100 biznese të cilat funksionojnë si një zonë TID dhe që ofrojnë një shumëllojshmëri shërbimesh dhe produktesh. Për më tepër Pazari i Tiranës është i njohur për arkitekturën e tij me forma shumëngjyrëshe nën të cilën është i ndërtuar një treg i produkteve të freskëta.