Rruga e hebrenjve

“Rruga e hebrenjve”, pjesë e kompleksit të Pazarit të Vlorës

Rruga e Hebrenjve e ka zanafillën në fundin e shekullit XVI, si pjesë e Pazarit të Vlorës, që ishte një nga elementët arkitektonikë urbanë më të rëndësishëm të qytetit të dikurshëm, i vendosur në hapësirën që kufizohet me Merkaton e Sahatit.
Pazari ishte kompleks dhe vlerësohet si hapësira më e rëndësishme e biznesit deri në dekadat e para të shekullit XX, ku fshatarët e zonave përreth tregtonin prodhimet e tyre bujqësore e blegtorale dhe njëkohësisht furnizoheshin duke blerë mallra dhe sende të përdorimit të përditshëm nga tregtarët vendas që kishin aty dyqanet e tyre.
Dyqanet përgjatë “Rrugës së Hebrenjve”, ishin të vendosura në ndërtesa të thjeshta një dhe dy katëshe dhe funksiononin pjesërisht edhe si banesa në katet e sipërme.
Ato ishin ndërtuar sipas teknikës së kohës, kryesisht me material druri, apo me çatma (qerpiç) dhe të tilla erdhën pjesërisht deri vonë, në vitet e para pas çlirimit, kur rruga nisi të transformohej dhe gradualisht të humbiste funksionin parësor të saj.
Në këtë rrugë, kishin dyqanet e tyre tregtarë dhe zanatçinj të njohur të kohës, që i kishin marrë me qera mjediset ku ushtronin aktivitetin, apo edhe ku njëkohësisht banonin.